جربت تدخل الريزين في الماكيت بتاعك قبل كدا ؟

فن الريزن بيُعد واحد من أروع فنون الحرف اليدوية اللي بينتج عنها عنها اشكال كثيرة رائعة في مجالات كثيرة جدا وأكثرها انتشارا وشهرة هو مجال صناعة الإكسسوارات

وكمان الريزين أصبح من التريندات والمستجدات في عالم الماكيتات والمصغرات ، وبدأ ناس كتير تتجه ليه عشان شكله الجمالي اللي بيضيفه للماكيت

في الأول ايه هو الريزين ؟

الريزين أو الاسم التاني ليه هو إيبوكسي الراتنجات (وبالإنجليزية: Resin Epoxy)‏ هو عبارة عن مادة كيمائية ، وبتتكون من مركبين:هم أساس (resin) ومضاف ليه (hardener) وهي بتكون مادة شديدة الالتصاق ومقاومة كمان للاحتكاك والمواد الكيماوية سواء كانت أحماض أو قواعد أو مذيبات، حيث انها بتتشكل طبقة عازلة عند جفافها. نقدر نستخدمها كطلاء أو مونة أو لاصق

ومادة الريزين من الانواع المتصلبة بالحرارة واللي بيكون صعب جدا تشكيلها مرة ثانية بالحرارة بعد تصلبها

وبتتميز مادة الريزين بالصلابة الشديدة والمقاومة

ومادة الريزين بقت منتشرة ومتوافرة بشكل كبير وسهل الحصول عليها وشرائها من اماكن كثيرة ، على سبيل المثال :

المحلات الكبيرة لبيع الدهانات والكيماويات

مكاتب الديكور

اون لاين ( يمكن شرائها اونلاين وفي ناس كتير بتبيعها اونلاين ولكن ابحث عن مكان وموقع مضمون وموثوق )

ومحلات مستلزمات الريزين بقت منتشرة جدا وليها أماكن معروفة زي (العتبة) في القاهرة

وفي أدوات بتسهل علينا كتير الشغل بالريزين عشان اقدر اصنعه او اشكله واشتغل بيه واطلعه بالشكل اللي محتاجه ، مثال على الادوات دي :

1-جوانتيات للشغل ( gloves ).
2- أقنعة خفيفة ( masks ) .
3- أوعية عشان اقدر اخلط فيها الريزن فيها.
4- ميزان الجرامات عشان اعرف احدد الكمية اللي محتاجها .
5- أدوات عشان اخلط بيها مادة الريزن، زي مثلا الملاعق البلاستيكية أو العصي الخشبية العريضة .
6- قوالب عشان اشكل بيها الريزن وتسهل عليا التشكيل واطلع الشكل زي مانا محتاجاه وعايزاه .
7- اشياء استخدمها للتغطية وبردو لحماية شغل الريزن فيها ممكن الأغطية تكون اغطية بلاستيكة أو كرتونية مش بتفرق .
8- مصدر للحرارة/ لهب.عشان تشكيل الريزين .
9- صبغات أو ألوان/ملونات للريزن وبلون بيها الريزين باي لون على حسب ما احنا محتاجينه .
10- حصيرة سيليكون.
11- لاصق شفاف.
12- مثقاب يدوي صغير.

وأهم حاجة في الشغل بالريزين هي احتياطات الأمان اللي بناخدها واحنا بنشتغل :

من الأفضل انك تشتغل في مكان مفتوح و كمان يكون جيد التهوية، مثلا : نفتح الشبابيك في المكان .

وكمان لازم وضروري جدا ارتداء قفاز لليد، يكون زي قفاز الأطباء؛ لأن الريزن لزج وصعب تنظيفه جدا

و ارتداء نظارات الأمان الطبية لحماية العين شئ ضروري

وممكن كمان اننا نقوم بوضع مفرش من البلاستك في المكان اللي بنخلط فيه الريزن عشان نمنع انه يتساقط مكان العمل ويصعب تنظيفة بعد كدا

ومن المهم جدا جدا اننا نبعد الأدوات المستخدمة عن أي مأكولات وعن متناول ايدي الاطفال .

في خطوات ثابتة بعملها وانا بشتغل اي شكل للريزين وبعدين بغير باقي الخطوات على حسب شكل المجسم اللي بعمله بيها ، الخطوات الاساسية هي :

بيكون عندنا علبتان واحدة مكتوب عليها ايبوكسي والثانية مكتوب عليها مصلب (hardener ) بناخد الكمية التي نحتاجها للشغل بمساعدة الميزان الحساس، وأهم حاجة ان النسبة بينهم تكون 1 إلى 3، ونخلطهم مع بعض كويس جدا لحد ما بيتكون عندنا خليط شفاف باستخدام العصي الخشبية، ولكن ناخد بالنا اننا نخلط ببطء عشان نتجنب تكون اي فقاعات في الخليط .

بعدين بنقسم كمية الإيبوكسي في أكواب بلاستيك ونبدأ نضيف عليهم الألوان التي هنشتخدمهت وعايزينها سواء كانت الالوان دي ألوان سائلة أو ألوان بودرة

وبكدا بنكون جهزنا الريزين عندنا بالالوان اللي محتاجينها ، وباستخدام القوالب اللي معانا او بأي طريقة تشكيل بقدر اطلع الشكل اللي محتاجه واقدر استخدمه وبنسيبه لمدة ٢٤ ساعة لحد ما يجف ونكون خلصنا 👌🏻

ونقدر نعمل بالريزين اي شكل او مجسم محتاجينه بمنتهى السهولة وعشان سهولته دي انتشر في كل المجالات من مجسمات واكسسوارت وديكور ومنتجات اخرى مختلفة

لو عندك اي استفسار عن الريزين او تطبيقه والعمل بيه تقدر تبعتلنا على رسائل الصفحة
ولو حابب تطلب المجسم والمصغر بتاعك ممكن تكلمنا او تملى الفورم دي

(https://forms.gle/hLMyKTUxTk8m3Lzp9)

وهيتم التواصل معاك عن طريق احد افراد الفريق 😄