ايه هي الماكيتات ( المجسمات ) ،وهي فعلا مقتصرة على المهندسين بس
؟
كلمة ماكيت او مجسم ممكن لو سمعتها وانت مش مهندس او ليك علاقة بالمجال الهندسي متعرفهاش اوي وتكون كلمة غريبة بالنسبالك بس في المقال دا هنعرف كل حاجة عن الماكيت من اول تعريفه وتاريخه ولحد استخداماته ومجالاته ..
الماكيت (maquette) دي كلمة فرنسية معناها نموذج تمهيدي او مجسم ..
الماكيت هو تنفيذ المشاريع و المنتجات بمقياس رسم مصغر أو مكبر عن الطبيعي اللي هتتنفذ بيه أو بنفس المقياس و لكن بخامات بديله و قد يكون به أجزاء متحركة أو ثابته و كلما كان فيه تفاصيل كان أقرب للواقع .
ونقدر نبسطها اكتر ونعرف الماكيت ب انه بيكون نموذج مصغر ملموس (ثلاثي الابعاد 3d ) للتصميم والمشروع بيوصل وبيعرض الفكرة والتصميم يعني المجسمات عبارة عن وسيلة عرض وأداة لفهم اي تصميم أو فكرة اقدر امسكها ب ايدي 
.
وتفتكر ايه تاريخ المجسمات دي ؟
فن صناعة الماكيتات والمجسمات دا مش فن مستحدث ولا لسا عارفينه وظاهر جديد ، بل بالعكس الفن دا ظهر من العصور القديمة وبدأ بافكار وخامات بدائية وبسيطة لكنه فضل يتطور مع الوقت والاكتشافات والصناعات الحديثة ومع توافر الخامات والادوات والعلم وصل للشكل اللي بنشوفه دلوقتي القدماء المصرين كانوا بيعتبروا الماكيتات والمجسمات جزء اساسي وخطوة تمهيديه لايمكن الاستغناء عنه قبل ما ينفذوا اي مشروع او بناء
وكانوا بيقدروا يستغلوا اي مادة ممكن استخدامها من احجار واخشاب و زجاج وخامات تانية كتير واقرب مثال لمجسمات من اعمال و اثار القدماء المصرين اللي وصلتلنا هي التماثيل على سبيل المثال وزي مجسمات كتيرة بيلاقوها في المعابد والمقابر بعد اكتشفاها زي مقبرة توت عنخ امون اللي ابهرت العالم
مش بس القدماء المصرين والحضارة المصرية القديمة لاء بردو حضارة كيوكوتيني اللي هي مهد للحضارة الاوربية وجدوا فيها تماثيل ومجسمات فخارية كتيرة ومتنوعة ترجع ل ٣٠٠٠-٦٠٠٠ سنة قبل الميلاد ولو فضلنا ندور عالمصغرات والمجسمات وتاريخها هنلاقيها في حضارات تانية كتير وصلتلنا وعرفناها او موصلتلناش لحد ماهنرجع للانسان البدائي اللي كان بيستخدم المجسمات دي وبينحتها عشان تسهل عليه حياته اليومية من ادوات للطهي والاكل او ممكن للحماية والصيد كمان 
طيب بعد ما عرفنا تعريف وتاريخ المجسمات والمصغرات ، نشوف دلوقتي احنا بنحتاجها او بنستخدمها في ايه دلوقتي ؟. وهل هي مقتصره على المهندسين بس. ؟
طبعا الماكيتات والمصغرات مش مقتصرة ابدا على المهندسين ، بالعكس هي بتدخل معانا وبنحتاجها في كل المجالات ، هنبدأ بالمجال الهندسي اللي اغلب الناس عارفينه وبعدين نشوف استخداماتها ومجالاتها الاخرى .
اول مجال هو المجال الهندسي :
فن الماكيتات والمجسمات مهم جدا بالنسبة للمهندسي وبيكون شئ اساسي في اي عمل ومشروع مهما كان حجم المشروع سواء مشروع بسيط او عملاق ، لعدة اسباب مهم في وضع تصور عام للمشروع أو المبني اللي هبنيه وبيوضح كل التفاصيل المهمة يعني الماكيت دا بيكون هو البوصلة اللي بترشد المنفذين وبييسهل جدا التواصل بين المهندس وباقي العمال في المشروع وبيوضح لكل شخص وكل فرض دوره ووظيفته ومطلوب منه يوصل لإيه بيقلل فرص الخطأ في الفهم او التنفيذ من فريق العمل ومن قبل البدء في المشروع بيوريك شكل المشروع المفروض يبقى ازاي في صورته النهائية ومن احسن مميزاته انه بيكون قابل للتعديل فبيسهل عمليه الارضاء لانك ممكن تعدله اي عدد من المرات لحد ماتوصل للشكل النهائي اللي يرضي جميع الاطراف القائمة على المشروع ، يعني هتخليك تتخلص من كل المشاكل او الجمل اللي ممكن تتقالك وقت تسليم المشروع زي مثلا ”دا مش زي اللي اتفقنا عليه – ومش هستلم الشغل دا – دا مش زي ما كنت متخيل ” ، فانت بالماكيت دا بتكون وفرت على نفسك وقت ومجهود كان هيبقى ضايع بيروح في الارض ، وخليك فاكر دايما اي تعديل بيكون اسهل كتير قبل التنفيذ عشان كدا الماكيت والمجسم جزء اساسي في اي مشروع ولا يمكن الاستغناء عنه
ثاني مجال هو مجال التسويق
(Marketing) الماكيت او المجسم مهم جدا في عملية التسويق خاصة التسويق العقاري ، لانه من اصعب مجالات التسويق بسبب المنافسة الكبيرة اللي فيه فالمجسم والماكيت دا هيخليك كشركة عقارية مميزة ، كل الشركات بتعمل دعاية عادية وتقليدية للمشاريع بتاعتها ووحداتها وتقعد توعد العميل بحاجات هو بيحاول يتخيلها ، لكن انت اللي هتخليه شايفها مش بس بيتخيلها الماكيت دا هو اللي هيخلي الرؤية كامله لمشروعك على ارض الواقع غير التخيلات اللي بتحاول توصلها للعميل وهيخليك توضح اي حاجة للعميل وهيخليه شايف وحدته والمشروع كله كانه عايش فيه من عقار لمساحات خضراء لأدق التفاصيل الماكيتات الهندسية بتخلي العميل ماسك وحدته في ايده شايف بعينه المشروع وكل تفاصيله واتخيل حياته جواه خلاص . ودا طبعا هيسهل عملية ارضاء العميل وكسب ثقته اللي هتوصلك في الاخر لهدفك وهو بيع المشروع 
.
ثالث مجال هو المجال الطبي :
المجال الطبي من المجالات اللي بتحتاج للمجسمات في شغلها باختلاف اقسامها وتخصصاتها
عل سبيل المثال ” طب الاسنان ” اللي بيحتاج فيه دكتور الأسنان مجسم على شكل فك الانسان سواء جاهز او معمول بمقاس اتاخد من فم المريض عشان كذا سبب :
انه يوضح للمريض المشكلة اللي موجودة عنده وازاي مأثرة عليه يشرح للمريض خطة العلاج ويوريله التغيرات اللي هتحصل في الفك بتاعه
يشرح للمريض الطريقة الصحيحة للاعتناء بالاسنان
بيكون طريقه لتسجيل ومتابعه حالة المريض والتطورات اللي حصل وحفظ حق المريض والطبيب
طريقة للتواصل بين طبيب الاسنان وفني الاسنان اللي بيعمل التركيبات بمختلف انواعها
دا كدا مثال واحد لتخصص من تخصصات الطب ولكن هنلاقي تخصصات تانيه كتيرة بتحتاج الماكيت للتواصل مع المريض او مع اي طرف تالت زي المعامل 
رابع مجال هو مجال التعليم :
استخدام المجسمات في المجال دا بيسهل كتير جدا ، لأن هنا بتتعامل بيه مع كل الاعمار بداية من الاطفال ولاخر مراحل التعليم ، في التعامل مع الاطفال بيكون دوره فعال جدا لانه بيوصل للسن الصغير المعلومات بما يناسب عقله وفهمه وبتبسطله الطريقة لاقصى درجة وبتخليه بيتعلمها وهو مستمتع وشايف الحاجة قدامه وماسكها كمان بإيده. وهنلاقي المدرسين بيستخدموا المجسمات في شرح كل المواد التعليمية ( مجسمات لحروف وارقام واشكال وحيوانات وانسان ….، )
ولو فضلنا ندور هنلاقي ان الماكيت داخل في كل المجالات والتخصصات الموجودة ، لانه بيوصل اي فكرة انت عايزها واي موضوع حابب تعرضه بيعرضلك هو صورة شاملة ودقيقة عن الموضوع بدون متعتمد على تخيل وتخمين الشخص اللي قدامك
وبكدا عرفنا ان فن صناعة الماكيتات والمجسمات والمصغرات مش مقتصر بس على المهندسين ولا المجال الهندسي وان هي فن مش مستحدث
فلو انت حابب تعرف اكتر عن الماكيتات او لسا عندك استفسارات تقدر تتابعنا على صفحتنا على الفيسبوك وتسيبلنا سؤالك او
ممكن تملى الفورم دي
( https://forms.gle/hLMyKTUxTk8m3Lzp9 )
وهيتم التواصل معاك عن طريق احد افراد الفريق