تصوير الماكيت بشكل صح وبطريقة احترافية تبين جماله مهم جدا ، خصوصا في مجال الدعاية لإنها هتأثر طبعا في حكم المشاهد على الماكيت بتاعك لإنه في الاخر بيشوف صوره ليه مش بيشوفه هو
وفي ناس كتير جدا بتكون عامله شغل وماكيتات تحفة لكن للاسف مش بتعرف تبين جمال الشغل دا ولا تعرض الماكيتات بتاعتها وساعات بتكون الصور اللي بيعرضوها دعاية سيئة ليهم وبتضر مش بتنفع ..
عايز تعرف ليه؟!!
لإنه مش بيهتم بفن تصوير الماكيت ودا عشان لو التصوير مبينش جمال شغلك وكل تفاصيل الماكيت بطريقة صح ، الشغل بتاعك بيتظلم وانت طبعا بتتظلم أكتر ومش بيبان المجهود والشغل اللي اتبذل
اللي ناس كتيرة جدا متعرفوش بس احنا لازم نعرفه إن في فن التصوير فيه قسم خاص بتصوير الماكيتات 
أثناء تصوير الماكيت عادة بناخد صور كتير للماكيت من قدام وورا وضوء النهار وصورة كأن الماكيت متصور بالليل 
باقي الصور بتبقى غالبا للتفاصيل الصغيرة جوة الماكيت
فيه نصايح مختلفة بنستخدمها في تصوير الماكيت عشان نحصل على أفضل مجموعة صور للماكيت وعشان كل التفاصيل والمجهود اللي اتبذل في الشغل كله يبان ويكون بأحلى شكل
اول حاجة ان التصوير يكون من زاوية عالية:
والخطوة دي بتدينا الفرصة اكتر إننا نشوف منظر كامل للماكيت بكل تفاصيله الصغيرة ، احنا بنتخيل نفسنا إننا طائر في السما شايف الماكيت من فوق وكمان كاشف كل تفاصيله الدقيقة و عشان كدة الزاوية دي بنسميها ونطلق عليها أحيانا (bird’s eye view)
تاني حاجة هي اننا نهتم بالتصوير من زاوية منخفضة:
من منظور الشخص وده اللي بيدي المشاهد إحساس انه كإنه واقف على الأرض وبيبص للمبنى
ثالث طريقة هي التصوير في مستوى العين:
هنا في الطريقة دي مكان الكاميرا بيبقى في نفس مستوى الماكيت وبناخد الصورة في نفس مستوى عين الشخص بالنسبة لطوله ودا عشان نحاكي التأثير البصري لرؤية الشخص ده في المساحة اللي هو واقف فيها
رابع طريقه ان لو كان الماكيت فيه سطح مائي ، فممكن ان احنا نصور انعكاس الماكيت دا على الماية
والطريقة دي هتديله شكل مختلف وجميل
خامس حاجة اننا أحيانا لو محتاجين نوضح حجم الماكيت الحقيقي بنحط جمبه حاجة حجمها معروف زي مثلا اننا بنحط المسطرة أو عملة محلية جنب الماكيت عشان نقدر نبين للي بيشوف الصورة حجم الماكيت في الحقيقة هيكون اد ايه وعامل ازاي
ساددس حاجه هي ان لو كان الماكيت دا حجمه كبير، بنطلب من شخص يتصور جنب الماكيت عشان نوضح في الصورة حجم الماكيت بالنسبة للشخص اللي واقف جمبه في الصورة دا ايه 
الخطوات دي وفن التصوير مش بس هتساعد الناس اللي بعترض شغلها لغرض الضغل والدعايا ، دا كمان هيكون مفيد كدا للطلبة اللي التعليم بقى اونلاين والتقييمات بقت اون لاين ومحتاج يعرض ويرفع شغله على هيئة صور ، فعشان تاخد تقييماتك كاملة اهتم بتصوبر الماكيت ومتهملش الخطوة دي ابدا .
لو عندك اي tips and tracks لتصوير الماكيت وايه حاجات ممكن تخلي الصور شكلها احلى وتبين تفاصيل الشغل اكتر ابعتلنا على رسائل الصفحة ،
ولو حابب تعرف معلومات اكتر او تسأل على اي تفاصيل ممكن تكلمنا على رسائل الصفحة او على ارقامنا او ممكن تملى الفورم دي
( https://forms.gle/hLMyKTUxTk8m3Lzp9 )
وهيتم التواصل معاك احد افراد الفريق 