من اهم الحاجات اللي بنفكر فيها اول ما نقرر نعمل ماكيت هي هنعمل الماكيت بانهي خامة ؟

ودا بسبب تواجد خامات كتير جدا في السوق متفاوته في الأسعار والمميزات والعيوب فبتبقى حاسس انك في بحر كبير و محتار و مش عارف تختار ولا تحدد و دماغك متلغبطة .

بين التفكير والتنفيذ خطوات كتيرة جدا بنمشيها من أول الفكرة والتصميم وحاجات وخامات بنحتاجها وادوات لازم نجهزها .

بعد ما بتكون استقريت على الفكرة اللي عايز تنفذها وتم الموافقة عليها ودي مرحلة ما قبل التنفيذ العملي واللي بتكون مش سهلة وبتاخد وقت كبير عشان تكون الفكرة مناسبة ، هنا بنبدأ التنفيذ العملي :-

الخطوة الاولى : اننا بنعمل التصميم اللي محتاجينه باستخدام برنامج ال (AutoCad) اللي بيكون مرن ودقيق جدا في مقاساته وأبعاده واللي من غيره مش هعرف اقطع بالليز

الخطوة الثانية : بختار الخامة المناسبة للماكيت واللي تطلع تفاصيله زي ماهو مطلوب مني وأختار على أساس كذا حاجة ( الشكل النهائي ، ميزانية المشروع ، الوقت والمجهود المبذولين )

الخطوة الثالثة : اننا بنعمل افراد للتصميم

والإفراد دا بيكون اهم خطوة في عمل الماكيت ، وهو اني بحول المجسم من شكل ثلاثي الابعاد (3d) الى شكل ثنائي الابعاد (2d) ودا اللي بعد ما بجمعه بيديني شكل الماكيت
وبيكون اكتر من ٦٠٪؜ من عمل الماكيت في خطوة الإفراد

الخطوة الرابعة : بنبتدي نقطع الخامات اللي اختارناها بالأشكال والأحجام اللي تناسب التصميم اللي عملناه

الخطوة الخامسة : بنجمع كل القطع والأشكال اللي قطعناها عشان نحصل في النهاية على شكل الماكيت اللي عايزينه

دي الخطوات الاساسية اللي كله بيمشي عليها ، لكن في خطوات وحاجات ممكن ناس كتير متهتمش بيها ودا اللي ممكن يأثر على الماكيت سواء في نقله او في شكله النهائي

على سبيل المثال ناس كتير مبتاخدش بالها انها بعد ما بتخلص الماكيت بتكون محتاجه تنقله للكليه او لمكان عرضه فمن الاول مبتكونش فكرت في قاعدة الماكيت

قاعدة الماكيت (the base) جزء اساسي ماينفعش اننا نهملها او منديهاش حقها .

مرحلة تجهيز القاعدة من المراحل المهمة في تنفيذ الماكيت، لازم تكون :-
خفيفة في وزنها
وفي نفس الوقت متينة وثابتة عشان ننقلها بسهولة
وتكون متشطبة كويس وشكلها الخارجي منتظم

بتتعمل غالبا بخشب الأبلاكاج بسمك ١٢ ملليمتر وإطار من خشب الموسكي أو من الفلين والكرتون لولماكيت البسيط الخفيف .

بالنسبة لتصنيع القاعدة، فهو بيحتاج إلى رسومات الموقع العام بالمقياس اللي هيتم عمل الماكيت بيه عشان الموقع ليه دور كبير جدا في اختيار شكل القاعدة

وبيكون في عندنا ٣ نماذج من القواعد : –

اول نموذج هو القاعدة المستوية (flat plate) :-

بتتصنع بنقل رسومات الموقع العام مباشرة على لوح من خشب الأبلاكاج سمك نص بوصة وبعدين نحدد المناطق المبنية وأماكن الشوارع والمناطق الخضراء باستخدام الدهانات وبعض الخامات زي الرمل ونشارة الخشب وبعدين نحط الكتلة المعمارية بعد ما نخلصها تماما

ثاني نموذج هو القاعدة الكونتورية (contoured plate) : –
بتتصنع بوضع طبقات من الفل سماكته تتناسب مع مقياس الرسم (scale) بين مستويات الكونتور المختلفة وبعدين بنقطع الطبقات دي عشان تماثل مناسيب المستويات الموجودة في رسومات الموقع العام وأخيرا بنحدد أماكن الممرات والمناطق الخضراء والكتل البنائية للمشروع بس هنا تنفيذ الكتلة البنائية لازم يبقى على القاعدة مباشرة

ثالث نموذج هو القاعدة ذات الميول الكبيرة (hillside plate) : –
لما يكون الموقع فيه ميول كبيرة، تنفيذ القاعدة بيحتاج أسلوب تاني في التنفيذ بنستخدم شرايح من الخشب عشان نشكل ميول الأرض وبعدين بنغطيها بشرايح معدنية وفوق الشبكة دي بنحط طبقة من المونة بسمك ٥ ملليمتر مكونة من (٥٠٪ مصيص + ٥٠٪ ألياف معدنية + ألوان جافة -ألوان أرضية- +ماية) وعليه لون بني عشان يشبه لون الأرض وممكن نستخدم ألوان الزيت عشان نظهر المناطق الخضراء وبردو في النموذج ده الكتلة البنائية تنفيذها بيبقى على القاعدة مباشرة

وبكدا بتكون عرفت تعمل الماكيت بتاعك وايه هي خطواته وكمان عرفت تنقله للماكن اللي هتعرض فيه الماكيت 😉

لو حابب اننا احنا اللي ننفذلك الماكيت 😄 تقدر تبعتلنا على رسايل الصفحة او تكلمنا على ارقام الشركة

او ممكن تملى الفورم دي ( https://forms.gle/hLMyKTUxTk8m3Lzp9 ) وهيتم التواصل معاك احد افراد الفريق