لون

“عايز اعمل ماكيت بس مش عارف احدد الخامة اللي اعمله بيها؟ ” 🤔

من اهم الحاجات اللي بنفكر فيها اول ما نقرر نعمل ماكيت هي هنعمل الماكيت بانهي خامة ؟

ودا بسبب تواجد خامات كتير جدا في السوق متفاوته في الأسعار والمميزات والعيوب فبتبقى حاسس انك في بحر كبير و محتار و مش عارف تختار ولا تحدد و دماغك متلغبطه .

طب نبدا كلامنا ب اننا تعرف الاول ايه مراحل تطور الخامات في فن صناعة الماكيت من اول ما ظهر ولحد ماوصلنا دلوقتي بالشكل الحالي ليه 🤔

بدأت من قرون مع بداية ظهور فن الماكيت بانهم بيحفروا وينحتوا المجسمات والمصغرات في الصخور زي ما بنشوف في التماثيل والمجسمات القديمة وبعدين بقى في تطور وبدأوا يستخدموا الورق المقوى (الكارتون) والاخشاب والبلاستيك وغيرها وغيرها في صناعة المجسمات 🚪 وفضل التطور في الخامات والمعدات المتطورة اللي تم اختراعها لحد ماوصلنا للمجسمات المصنوعة من الخامات الحديثة اللي بنشوفها وبنستخدمها دلوقتي ..

فتعالى دلوقتي هنتكلم عن ايه الخامات اللي ممكن نستخدمها في عمل الماكيت والمجسم وبعدين نتكلم عن اختيارنا للخامة هيكون ازاي .🤷🏻‍♀️

الأول ايه الخامات المتاحة وممكن اعمل بيها الماكيت ؟

الماكيتات والمجسمات بتتعمل بخامات كتير، و في الحقيقة هو ممكن يتعمل بأي خامة في الدنيا طالما قابله للتشكيل و كمان التحكم فيها سهل 👌
المشهور منهم الخشب، الفوم، الكرتون، الفلين، الأكريليك والصلصال

▪️الأول خلينا نتكلم عن الخشب :

الخشب من اقدم الخامات اللي اتعمل منها المصغرات والمجسمات ، بدأ استخدامه من العصور القديمة ونقدر نشوفه في كل المتاحف والاماكن الاثرية .

وكمان الخشب ليه انواع كتيرة جدا ممكن نستخدمها في المصغرات منها الطبيعي ومنها الصناعي ..

زي مثلا :

خشب الزان : دا خشب طبيعي هو من افضل انواع الخشب علي المستوي العملي وصناعة الاثاث 🚪؛ ودا عشان صلابته وتحمله لدرجات الحراره العالية وصعب انه يتعرض للتسوس و لا يتقوس بسهوله ؛ وعلي مستوي صناعة الماكيتات انه سهل تشكيله بعد تعرضه للبخار 🌬 .

خشب البلسا : وده نوع من الأخشاب اللي سمكه رفيع فتقطيعه بيبقى سهل ولزقه كمان ودا بيخليه ينجز معاك جدا في شغل المجسمات والمصغرات

خشب البلوط : دا نوع من انواع الخشب الطبيعي ودا قوي ومرن في نفس الوقت وبيستحمل ويعيش كتير وبيكون مثالي جدا في التصميمات القوية والتفاصيل الدقيقة

خشب الموسكي : خشب طبيعي ولونه فاتح وبيكون لين في استخدامه و هو يعتبر من أرخص أنواع الخشب الطبيعية ومن اهم مميزاته الواضحة ان فيه عقد بنيه وهي تجزيعات الخشب ؛ ودي بتديله شكل جميل وخصوصا في اختيار الماتريال للماكيت ؛ والبقع دي كل ما زادت كل ما قل ثمن كل ما زاد جمالا. ❤

خشب ال Mdf :

دا نوع من الخشب المصنع و هو خشب ليفي متوسط الكثافة وهوا اختصار ل Medium Density Fiberboard .ومن مميزاته الي بتخيله من أوائل الاخشاب المستخدمة في صناعة الماكيتات ☝🏻 انه خفيف الوزن ف بيسهل نقله من مكان لاخر وغير كدة فهو اقتصادي وسعره رخيص في السوق 💸 ؛ وسهل التشكيل ؛ وليه اكتر من سمك فهوا بيبدا من سمك 2 مم لحد 30 مم ؛ وبردو مساحاته مختلفه 1220 مم * 2440 مم ؛ 1830 مم * 3660 مم .
4⃣

خشب الابلاكاچ : دا نوع من الخشب المصنع ، هو مصنوع من طبقات رقيقه من الخشب متركبه فوق بعضها البعض ودا بيديله سهوله في التشكيل والتكسير ؛ وسمكة بيتراوح بين 0.2 الي 3.2 مم.

▪️

تاني خامة بنستخدمها هي االكرتون ( الورق المقوى ) :
زي الخشب في صلابته بس أخف في الوزن وبيتقص بسهولة وكمان الأجزاء المنحنية بتتعمل منه أسهل واسرع 👌🏻

▪️تالت حاجة الفلين :

في نوع من انواع الفلين اسمه الفلين المضغوط بيتباع على شكل لواح مقاسها بيكون ثابت ١*٢م
وكل كا زاد الضغط بتزيد جودة الفيلين وبيكون اقوى ودا بيسهل الرسم عليه وبيسهل تلوينه كمان وعشان كدا بيكون مادة مناسبة في صناعة المجسمات و
بنستخدمه للمجسمات الكتلية⛰️

▪️رابع حاجة الصلصال :

مادة طينية تشكيلها بيكون سهل جدا وكمان سهل في تلوينة والادوات اللي بنحتاجها عشان نوصل بيها لشكل المصغر اللي عايزينه بتكون بسيطة جدا وسهله الاستخدام
بنستخدمه في صناعة المجسمات الكتلية، ممكن نعمل بيه الهضاب والجبال اللي حوالين المباني في الماكيت أو أي شكل غير منتظم أو أي شكل فراغي معقد زي القبة ⛺

◼️خامس حاجة الزجاج :
دا ممكن نستخدمه في واجهات المباني والشبابيك او البنورات مثلا

▪️سادس خامة هي الأكريليك:

دا احد انواع البلاستيك بعد ما اتعالج حراريا وليها ميزات كتير زي
انها الشفافية بتاعتها عالية ونفاذيتها للضوء عالية جدا لدرجة انها تفوق الزجاج
وبتكون مادة خفيفة والسطح بتاعها ناعم
وبتقاوم تغيرات الجو فبتكون مادة ممتازة للمجسمات اللي هتفضل معرضه للجو

عشان كدا بتستخدم للمجسمات اللي محتاجين

فيها شفافية

◼️ سابع حاجة الفوم :

دا بقى ممكن نستخدمه في كل حاجة وهو اكتر مادة مستخدمة في صناعة الماكيتات ، مجسمات مباني واثاث وممكن نوظفه
في اي شكل ويحل محل خامات تانية زي الخشب مثلا
عشان مميزاتة كتيرة جدا

تكلفتها قليلة وسعرها مناسب جدا
مش بتتأثر ولا بتبوظ من الماء
سهل جدا انك تقطعها وتشكلها لأي شكل انت محتاجه
وزنها خفيف فسهل عليك تحركها وتنقلها
وممكن تتلون باي حاجة انت عايزها

وطبعا لسه فيه أنواع تانية كتير جدا ممكن نستخدمها وزي ما قولنا ممكن نستخدم اي حاجة واي مادة نقدر نتحكم فيها 🤷🏻‍♀️

ومن هنا ندخل لتاني نقطة بنتكلم فيها وهي ازاي اختار الخامة ؟

لازم تعرف انك بتختار الخامة على اساس كذا حاجة مش حاجة واحدة

١- التكلفة بتاعة الخامة
٢- انها تكون مناسبة للشكل اللي انا عايزاه
٣-الوقت اللي هحتاجه عشان اوظف الخامة دي واطلع منها بالشكل اللي محتاجاه

٤- اللي مجهود اللي هبذله في الشغل بالخامة

بيكون صعب انك تحقق ال ٤ في نفس الخامة
يعني مثلا ممكن تختار خامة رخيصة زي ال “فوم” مثلا تلاقيها بتاخد وقت ومجهود كبير عشان تطلع بالشكل المناسب
فتبقى عارف انك هتوفر في الوقت والمجهود فهتلاقي التكلفة زادت منك
او هتوفر في التكلفة هتزود وقت ومجهود

وفي مثلا مادة زي الكارتون ، سعرها رخيص جدا وسهلة في الشغل ومبتاخدش وقت وبتسهل عليك تعبر عن الفكرة بتاعتك
بس في النهاية هو بيكون كارتون 🤷🏻‍♀️ مش هتقدر تعتمد عليه لوحده عشان تطلع ماكيت كبير وقيم 👌🏻
بس لو ماكيت بسيط وفكرة بسيطة هيكون خامة مناسبة جدا

وهكذا

فلازم تكون عارف ميزة وعيب كل خامة وتقارن وتختار انت هتعرف تحقق ايه من الاربعة وتتنازل عن ايه عشان توصل في الاخر لنتيجة كويسة 😄

ولو حابب تعرف اكتر عن الخامات او عندك اي استفسار تقدر تتواصل معانا عن طريق صفحتنا على الفيسبوك

او ممكن تملى الفورم دي ( https://forms.gle/hLMyKTUxTk8m3Lzp9 ) وهيتم التواصل معاك احد افراد الفريق 😄