حلول المساحات الصغيرة

لو بيتك صغير تبقي محظوظ

عارف ليه؟

عشان لسنين طويلة كانت مشكلة المساحات الصغيرة هي الشغل الشاغل لمصممين الديكور

آلاف الدراسات و الإختبارات اتعملت بس عشان تحل المشكلة دي

و إحنا لخصنا لك أهم النقط اللي تم استنتاجها في الدراسات دي

 و هنقسمهم لقسمين

١) قسم لحل الجانب النفسي في الإحساس بضيق المكان

٢) و القسم الثاني نصائح لحل المشكلة العملية في عدم وجود مساحة كافية للأثاث و التخزين و غيره

أول قسم : الجانب النفسي 

و ده أهميته بتكمن في إنك متحسش أصلاً ان المكان ضيق أو إنك مش مرتاح فيه

و أول إستنتاج كان إن الضوء هو اللي بيخلينا ندرك الاشياء و المساحات حولنا فمن أهم العوامل اللي بتفرق في الإحساس بضيق أو وسع المكان هي كمية الضوء الموجودة فيه و توزيعه بالطريقة المناسبة

و بالتالي وجود شبابيك كبيرة في المكان بتدخل كمية ضوء كبيرة هي من الحاجات المهمة في الأماكن الصغيرة رغم اقتطاعها لجزء كبير نسبياً من الحوائط!

و لو الفيو من الشباك حلو ده بيكون له تأثير حلو جداً علي المكان لأنه بيعطي له عمق و بيشد الأنظار خارج حدود المكان فبيدي انطباع بالوسع

بس في خبر حلو لو المكان عندنا مفيهوش شبابيك كبيرة 

و هو إن وجود المرايات بتعمل نفس عمل الشبابيك لأن بتوظيفها بالشكل الصحيح بتعكس اكبر قدر من الضوء و تعكس أركان المكان فبتدي إحساس بالوسع

و لنفس السبب علي طول بنسمع ان الألوان الفاتحة هي أفضل إختيار للأماكن الضيقة لأن الألوان الفاتحة مش بتمتص الضوء و بتعكسه بعكس الألوان الغامقة

حتي السجاجيد ! 

الدراسات أثبتت إن السجاجيد بالذات الغامقة بتمتص جزء كبير من الضوء الواقع عليها بعكس السيراميك أو البورسلين أو الرخام

و ال patterns كمان مش أفضل إختيار للأماكن الضيقة ، عشان وجود patterns كتير بيمتص الضوء و ممكن يوحي بضيق المساحة لو لم يتم توظيفه بطريقة مناسبة للمكان

كفاية كده علي الضوء

ندخل علي إتجاه الخطوط لو استخدمناها في الحوائط أو الأرضيات

و اللي لها عامل كبير في الإحساس بالمساحة 

زي إن الخطوط الرأسية بتشد العين لفوق و بتزود الإحساس بالارتفاع

بينما الخطوط الأفقية بتقلل الإرتفاع لكن بتزيد من العرض

تاني قسم هو

٢) الحلول العملية

مع كل الحيل النفسية دي إحنا نقدر نخدع عقلنا لكن أجسامنا ثلاثية الأبعاد ،لو في أثاث كبير و كتير في مساحة صغيرة مش هنقدر نتحرك بأريحية و هنحس بضيق المكان

فأهم حاجة إننا نختار أثاث حجمه مناسب للمساحة ولا كبير أوي ولا صغير أوي

و نراعي جداً مسارات الحركة و سهولة الوصول لأي جزء في المكان

و مع اختيار الحجم المناسب مهم نختار أثاث ذكي ، زي مثلاً إنه يكون في أماكن كتير للتخزين 

أو بيقوم بأداء كذا مهمة زي إن الكنبة تتقلب سرير أو ترابيزة الوسط يكون فيها عدد من الكراسي الصغيرة اللي بتطلع منها وقت الحاجة و في أمثله كتير جداً للنوع ده من الأثاث

أكيد التصميم الصح بيفرق في كل تفاصيل حياتك و عشان كده متضيعش علي نفسك فرصة الاستمتاع بكل جزء في بيتك و لو عايز تعرف تفاصيل اكثر أملي الفورم دي و هنتواصل معاك